LITT OM KUNSTNAREN

Rita Slotterøy er oppvokst på Hareidlandet, men bur og arbeidar i dag som kunstnar i Los Angeles, California. Ho har alltid hatt ei sterk interesse for kunsten og utdanna seg til lærar innan kunst- og handverkfaget i Notodden, Telemark. Etter å ha fullført hovudfag og jobba ein del med ulike former for kunst-undervisning tok ho etter kvart til med vidareutdanning innan maling og keramikk i California.

Kunstnaren er glad i naturen og finn mykje av inspirasjonen til bileta sine her. Dette vert likevel ofte omforma gjennom den kreative og skapande prosessen:

“Eg jobbar alltid med utgongspunkt i ein ide eg har, men ofte tek den kunstnariske prosessen over og det som kjem til syne på lerretet er blitt omforma til eit abstrakt eller abstrahert uttrykk. Gjennom kunsten søkjer eg å gjengi mine erfaringar. Eg malar ting slik eg minnast dei. Det handlar ikkje så mykje om korleis noko faktisk er, men heller slik det føles  - essensen i opplevinga.”

Bileta ber også  preg av hennar keramiske bakgrunn der gamle dekorerings-teknikkar som “horning” (på engelsk; slip-trailing) vert nytta på ein ny og kreativ måte i biletflata  -  leira har blitt erstatta med ulike male-medium og skaper på denne måten eit heilt nytt og unikt utrykk.


HEIM - BILDE - KERAMIKK - CORPORATE ART SALES - KONTAKT - NYTT